Nanna Ida Kaaber fæddist í Reykjavík 21. maí 1918, lést í Reykjavík 5. maí 2011.
Foreldrar Nönnu voru Ludvig Emil Kaaber frá Danmörku, f. 1878, d. 1941 og kona hans Astrid Bertine, f. Thomsen 1884, d. 1928.
Nanna giftist 22.9. 1945 Bjarna Árnasyni, f. 1918, d. 2004, þau skildu. Foreldrar hans voru Árni S. Bjarnason, f. 1879, d. 1969 og kona hans Björg Stefánsdóttir, f. 1880, d. 1968. Börn Nönnu og Bjarna eru: 1) Árni Emil, f. 1948 og 2) Ástríður Björg, f. 1955.
Kornung dvaldi Nanna með foreldrum sínum á Borgundarhólmi um skeið. Hún ólst svo upp á Hverfisgötu 28 og lauk gagnfræðaprófi frá Gagnfræðaskóla Reykjavíkur. Nanna starfaði við skrifstofustörf um tíma, en lærði svo garðyrkju í Fagrahvammi í Hveragerði. Hún nam garðyrkju- og blómaskreytingar í Árósum og kom heim með síðustu ferð Gullfoss fyrir stríð 1939. Nanna stofnaði blómabúðina Garð við Garðastræti ásamt með Stefáni Árnasyni. Árið 1959 hóf hún að vinna hjá danska sendiráðinu og starfaði þar í 30 ár, fram til ársins 1988 þegar hún stóð á sjötugu. Nanna var einn af stofnendum ferðafélagsins Útivistar, sat í kjarna þess frá upphafi og var heiðursfélagi. Hún var fararstjóri í áratugi og fór í sína síðustu ferð sem slíkur árið 2005, þá 87 ára.
Published
Afhent 25. ágúst 2017, viðbót við afhendingu frá árinu 2016.
Úr fórum ættmenna.