Hallveigarstaðir er húsið að Túngötu 14 í Reykjavík. Það var byggt af kvennasamtökum og ætlað að vera miðstöð þeirra. Kvennaheimilið var vígt 1967 en hugmyndin að húsinu kviknaði snemma eftir að Bandalag kvenna í Reykjavík var stofnað árið 1917. Það var nefnt Hallveigarstaðir í minningu Hallveigar Fróðadóttur, landnámskonu og fyrstu húsfreyjunnar í Reykjavík, eiginkonu Ingólfs Arnarsonar. Kvenfélagasamband Íslands, Bandalag kvenna í Reykjavík og Kvenréttindafélag Íslands hafa aðstöðu í húsinu og sjá um rekstur þess. Samkomusalur er í kjallara hússins og þar hafa farið fram margar kvennasamkomur.