Menntun: Stúdentspróf frá MR 1955. Nám í jarðfræði við Kaupmannahafnarháskóla 1955-1956. Lokapróf í húsagerðarlist frá Det kongelige akademi í Kaupmannahöfn 1963.

Starfsferill: Vann á teiknistofu prófessors Poul Kjærgård 1962 og prófessors Viggo Møller Jensen og Tyge Arnfred 1963-1966. Kennari við inntökupróf og stundakennari við Arkitektaskólann í Kaupmannahöfn 1964-1966. Rak ásamt fleirum teiknistofuna Höfða 1967-1979. Forstöðumaður Þróunarstofnunar Reykjavíkurborgar 1979-1980. Forstöðumaður Borgarskipulags Reykjavíkur 1980-1984. Hefur rekið eigin teiknistofu, Teiknistofu Guðrúnar Jónsdóttur, frá 1984. Hefur hannað verk af ýmsu tagi á sviði skipulags og bygginga, bæði umfangsmiklar svæðisskipulagsáætlanir, aðal- og deiliskipulagsáætlanir, nýbyggingar, endurbyggingar og innréttingar.

Önnur störf: Formaður Torfusamtakanna 1972-1979. Í norrænni ráðgjafarnefnd um menningarmál á vegum Norrænu ráðherranefndarinnar 1972-1984. Í stjórn Arkitektafélags Íslands 1969-1973, formaður 1970-1972. Í framkvæmdastjórn Listahátíðar 1974-1976. Í nefnd á vegum Rannsóknarráðs ríkisins um stöðu og þróun byggingariðnaðar 1979-1981. Í framkvæmdanefnd á vegum forsætisráðherra um könnun á framtíðarhorfum á Íslandi næsta aldarfjórðung 1984-1986. Í Skipulagsstjórn ríkisins 1985-1990. Varaborgarfulltrúi, síðar borgarfulltrúi, Nýs vettvangs í Reykjavík 1990-1994. Varaborgarfulltrúi Reykjavíkurlista frá 1994. Í skipulagsnefnd Reykjavíkur 1990-1998. Formaður menningarmálanefndar Reykjavíkur frá 1994. Formaður byggingarnefndar Listasafns Reykjavíkur í Hafnarhúsi og byggingarnefndar Grófarhúss. Yfirmaður 13. umdæmis hinnar alþjóðlegu Zontareglu (Danmörk, Ísland, Noregur) 1990-1992. Formaður stjórnar Búmanna hsf. frá 1998.

Ritstörf: Meðhöfundur ýmissa greinargerða um skipulagsmál frá Borgarskipulagi Reykjavíkur 1980-1984 og ritsins Gróandi þjóðlíf 1986. Meðhöfundur að riti um hverfaskipulag Vesturbæjar, Austurbæjar og Norðurmýrar 1987. Greinar í blöðum og tímaritum.

Viðurkenningar: Hlaut verðlaun fyrir námsárangur 1959, 1960 og 1961. Verðlaun, ásamt öðrum, í samkeppni um skipulag nýs borgarhluta í Álaborg 1965. Viðurkenning fyrir tillögu í samkeppni um kirkju í Laugarási 1966. Hlaut á árunum 1970-1979 þriðju verðlaun, ásamt öðrum, fyrir tillögu að viðbyggingu við Flensborgarskóla, önnur verðlaun fyrir skipulag þjóðgarðsins á Þingvöllum, verðlaun fyrir íbúðabyggð á Eiðsgranda og viðurkenningu, ásamt öðrum, fyrir tillögu að endurlífgun Bernhöftstorfunnar. Hlaut verðlaun úr Minningarsjóði Sigurðar Guðmundssonar fyrir tillögu sem nefndist Þáttur Þingholta í þróun vaxandi borgar. Fyrstu verðlaun, ásamt öðrum, í samkeppni um miðbæ í Mosfellsbæ 1984 og í samkeppni um Arnarhól 1985. Verðlaun í samkeppninni „Ísland árið 2018“ 1997 og viðurkenning, ásamt öðrum, í boðskeppni um deiliskipulag Naustahverfis á Akureyri 1997.
Heimild: Samtíðarmenn 2003

• íslenska