• Fóstra, Fóstrufélag Íslands

Árið 1924 var Barnavinafélagið Sumargjöf stofnað en segja má að með stofnun félagsins hafi verið lagður grunnur að stofnun Fóstrufélags Íslands sem síðar varð Félag íslenskra leikskólakennara árið 1991.

Stéttarfélagið Fóstra (hét fyrsta árið Athöfn ) var stofnað 6. febrúar 1950 og gekk nokkru síðar í Alþýðusamband Íslands. Tilgangur félagsins var einkum sá að annast kjarasamninga og gæta hagsmuna félaganna. Þann 4. desember 1964 gerðust starfandi fóstrur í Reykjavík fastir borgarstarfsmenn. Gekk þá Stéttarfélagið Fóstra úr ASÍ og fóstrur gerðust í framhaldinu félagsmenn starfsmannafélaga í viðkomandi sveitarfélögum. Á aðalfundi árið 1965 var nafni félagsins breytt og hét eftir það Fóstrufélag Islands. Í lögum þess segir m.a., að tilgangur félagsins sé að efla fóstrustéttina, glæða áhuga á öllu, er varðar fóstrustarfið, efla framhaldsmenntun og gæta fjárhagslegra hagsmuna félaganna. Fóstrufélagið starfaði sem fagfélag til ársins 1988 en það ár öðlaðist félagið samningsrétt. Félagið skipti síðan um nafn 1991 og tók upp núverandi nafn, Félag íslenskra leikskólakennara.