F. í Reykjavík 16. júlí 1912, d. í Reykjavík 12. júní 2003.
For.: Guðlaug Jónsdóttir húsmóðir, og Guðmundur Guðmundsson sjómaður.

Elín giftist Stefáni Ögmundssyni prentara 1. maí 1934 (f. 22. júlí 1909, d. 3. apríl 1989). Dætur Elínar og Stefáns eru: Ingibjörg, fædd 18. október 1934, síðast starfsmaður Hjartaverndar, Steinunn, framhaldsskólakennari, fædd 2. júní 1938, Bergljót, starfsmaður Sameinaða lífeyrissjóðsins, fædd 13. nóvember 1940 og Sigríður, réttarfélagsfræðingur, fædd 18. apríl 1951.

Elín ólst upp í austurbænum í Reykjavík og stundaði nám í Barnaskóla Reykjavíkur. Hún var lengst af húsmóðir en stundaði jafnframt verkakvennastörf tímabundið. Elín var á meðal stofnenda Félags ungra jafnaðarmanna árið 1928 og var í fyrstu sendinefnd verkamanna og bænda sem héðan fór til Sovétríkjanna árið 1931. Hún var virkur félagi í Kommúnistaflokki Íslands frá 1932, átti sæti í stjórn Sósíalistafélags Reykjavíkur og miðstjórn Sameiningarflokks alþýðu- Sósíalistaflokksins, var formaður Kvenfélags sósíalista um margra ára skeið og fulltrúi félagsins á heimsþingum kvenna í Kaupmannahöfn 1953 og Helsinki 1968. Í stjórn M.Í.R. 1970-1979. Hún var meðal stofnenda Kvenfélagsins Eddu (eiginkonur
prentara) 1948, formaður þess um 20 ára skeið og átti sæti í Félagsheimilisnefnd Hins íslenska prentarafélags. Elín var virkur félagi í Kvennaframboðinu og Samtökum um kvennalista frá upphafi og var einn af stofnendum Vinstri hreyfingarinnar- græns framboðs. Hún starfaði auk þess með ýmsum kvennasamtökum svo sem Rauðsokkahreyfingunni, Bandalagi kvenna í Reykjavík og Kvenréttindafélagi Íslands.