Guðrún Jóhannsdóttir var fædd að Grjótárgerði í Fnjóskadal 9. september 1878. Foreldrar hennar voru Jóhann Einarsson (1851–1924) og Kristín Salóme Jónsdóttir (1854–1885). Þriggja ára gömul fluttist Guðrún að Víðivöllum í Fnjóskadal ásamt foreldrum sínum. Eftir að móðir hennar lést brá faðir hennar búi um skeið og var hún skráð tökubarn í Grjótárgerði um 1885–1886 en síðan viðloðandi hjá föður sínum á Víðivöllum til 1899. Hún gekk í Kvennaskólann á Laugalandi. Var heimiliskennari á Borg á Mýrum 1899–1909 og dvaldi einn vetur í Reykjavík við tungumálanám. Hún var húsfreyja á Ásláksstöðum í Kræklingahlíð 1909–1930 en eftir það búsett á Akureyri.

Árið 1909 giftist Guðrún Sigurjóni Sumarliðasyni (1867–1954) og áttu þau einn fósturson, Vigni Guðmundsson (1926–1974).