Fæddist í Reykjavík 9.2. 1915, d. 6.12. 2008.
Foreldrar voru Pétur Halldórsson, cand. phil., bóksali, síðar borgarstjóri og alþingismaður og kona hans Ólöf Björnsdóttir húsfreyja.
Systkini Ágústu voru Björn, bóksali og verslunarstjóri, Halldór listmálari, og Kristjana húsfreyja.
Ágústa ólst upp í Reykjavík, gekk í Landakotsskóla, síðan í Miðbæjarskóla og Gagnfræðaskóla Reykjavíkur. Hún iðkaði fimleika og sund og var tennisdrottning Íslands um skeið. Hún stundaði nám á Kunsthaandværkerskolen í Kaupmannahöfn árin 1933-1936. Að loknu prófi þaðan í auglýsingateiknun setti hún á stofn teiknistofu í Reykjavík og var fyrsti Íslendingurinn sem menntaður er í þeirri grein.

Ágústa giftist 10.7.1937 Hans Henrik Pay Larsen, bankastarfsmanni, f. 24.2. 1912, d. 1.5. 1943. Seinni maður Ágústu var Pétur Valdimar Snæland forstjóri, f. 10.1. 1918, d. 27.6. 2002. Þau giftust 12.6. 1943. Pétur og Ágústa eignuðust þrjá syni saman, en frá fyrra hjónabandi átti Ágústa ungan son sem Pétur ættleiddi og gekk í föður stað.

Jafnhliða húsmóðurstörfum vann Ágústa að listsköpun. Vinnustofa hennar var um skeið í Aðalstræti 12 þar sem langamma hennar og nafna, Augusta Svendsen, hafði rekið verslun. Hún hannaði m.a. merki fyrir stofnanir og fyrirtæki: Stálhúsgögn, Barnaspítala Hringsins, Prestafélag Íslands, Landsvirkjun og Listahátíð eru dæmi um það. Ágústa skapaði eftirsótta minjagripi, kríur, svani, fiðrildi í óróum og fleiri form úr þorskhausbeinum. Hún þrykkti á tau bæði mannlífsmyndir sem hún skar í dúk og við og fékk innblástur og mynstur úr náttúrunni. Ágústa orti ljóð sem birtust m.a. í tímariti Máls og menningar.